Dymbilvikan og páskarnir 2023 voru viðburðaríkir dagar í Skarðinu.

Símanúmeramót SSS fór fram á skíðasvæðinu í Skarðinu og tóku um 40 keppendur þátt við fínar aðstæður. Að loknu móti var öllum boðið í kakó. Þetta mót er ein af fjáröflunum félagsins en velviljarar félagsins leggja félaginu til símanúmer sitt til keppni gegn áheiti og svo keppa iðkendur félagsins fyrir hönd símanúmeranna. Sigurvegarinn fær svo vinning í boði SSS. Við þökkum þeim sem styrktu klúbbinn.

KLM mótið hjá 4. bekk og eldri í svigi var haldið laugardaginn 8. apríl í Skarðinu við mjög flottar aðstæður. Heitt var í veðri, sól og salta þurfti brautina sökum vorfæris. Mótið gekk vel í alla staði og gleðin skein úr andlitum krakkanna.

Laufey Petra Þorgeirsdóttir æfði og keppti með krökkunum. Hún er í námi á Akureyri þar sem hún æfir með Skíðafélagi Akureyrar og keppir fyrir SSS. Hún hefur staðið sig mjög vel í unglingaflokki á mótum á vetrinum – Vel gert Laufey!

Foreldrar iðkenda stóðu í ströngu undanfarna daga í sjoppunni uppí Skarði. Seldu vöfflur, sælgæti, drykki, samlokur, hamborgara og franskar sem aldrei fyrr. Stjórn SSS vill koma á kæru þakklæti til allra sem hönd lögðu á plóg!

Föstudaginn 31. mars 2023 var haldið KLM mótið fyrir iðkendur í 3. bekk og yngri.
Veður var ágætt en færið farið að minna á sumarið. Allir skemmtu sér vel 🙂

Helgina 24.-26. mars 2023 fór Unglingameistaramótið í Alpagreinum fram í blíðskaparveðri í Bláfjöllum á Ármannssvæðinu.

Alpagreinakrakkarnir og foreldra þeirra fjölmenntu þar en mótið gekk vel fyrir sig. Brautin var hörð og reyndi vel á hæfni keppenda.

Iðkendur okkar náðu fínum árangri. Iðkendur SSS kepptu allir í aldursflokki 12-13 ára.

Strákarnir voru þrír: Sebastían Amor Óskarsson hafnaði í 6. sæti í svigi, 11. í stórsvigi og 4. í samhliðasvigi, hársbreidd frá verðlaunasæti. Steingrímur Árni Jónsson varð 8. í sviginu,  8. í stórsvigi og datt út í samhliðasviginu í viðureign við Alex Helga (sigurvegara samhliðasvigsins) í áttaliðaúrslitum. Haraldur Helgi Hjaltason hafnaði í 26. sæti í stórsvigi.

Í flokki stúlkna SSS næstflesta keppendur frá sama klúbbi eða sjö. Mundína Ósk Þorgeirsdóttir varð 6. í stórsvigi. Tinna Hjaltadóttir varð 19. í stórsvigi og 28. í svigi. Emma Hrólfdís Hrólfsdóttir hafnaði í 23. sæti í stórsvigi og 17. í svigi. Sóley Birna Arnarsdóttir varð 28. í stórsvigi og  20. í svigi. Alexandra Ísold Guðmundsdóttir hafnaði í 29. sæti í stórsvigi og  23. í svigi. Hólmfríður Dögg Magnúsdóttir varð 30. í stórsvigi og  18. í svigi. Margrét Hlín Kristjánsdóttir varð 31. í stórsvigi og  21. í svigi.

SSS á mjög efnilega iðkendur í unglingaflokki sem við getum verið stolt af. Hampa má því góða starfi sem þjálfarar krakkana,  Anna María og Ingvar hafa innt af hendi og síðast en ekki síst heldur hópurinn okkar, iðkendur, foreldrar og þjálfarar að, heilla aðra með gagnkvæmri virðingu, virðingu gagnvart öðrum og samstöðu.

Kveðja,

Stjórnin

Um helgina fór fram Jónsmótið á Dalvík þar sem keppt er í svigi (2 ferðir), stórsvigi (1 ferð) og sundi. Mótið er fyrir krakka í 4.-8.bekk (fædd 2009-2013) og mættu yfir 200 keppendur frá öllum skíðafélögum landsins.

Dalvíkingar voru búnir að leggja mikla vinnu á sig svo mótið færi fram enda takmarkaður snjór og eiga þeir hrós skilið fyrir alla þá vinnu sem og framkvæmd mótsins, sem gekk heilt yfir mjög vel.

SSS var fjórða fjölmennasta félagið á mótinu en 16 keppendur komu frá SSS á mótið og stóðu þau sig frábærlega bæði í fjallinu og í lauginni. Fjölmargir iðkendur unnu til verðlauna á mótinu og enn fleiri unnu glæsilega persónulega sigra. Toppurinn var svo er félagið vann Jóhannsbikarinn en bikarinn er veittur fyrir glaða og jákvæða framkomu og hegðun á meðan móti stendur. Sérstök nefnd á vegum mótsins velur eitt félag, þar sem horft er yfir hópinn og eru engir undanskildir. Litið er til hegðunar foreldra, þjálfara og keppenda. SSS var að mati dómsnefndar með mjög góða liðsheild, hvöttu hvort annað vel áfram í brekkunni og í lauginni og voru áberandi á mörgum sviðum. Þess má einnig geta að SSS vann bikarinn einnig árið 2020.

Nafn	Flokkur	Svig	Stórsvig	Sund	Stórsvig+Sund
Steingrímur Árni Jónsson	13 ára	3	7	4	4
Alexandra Ísold Guðmundsdóttir	13 ára	13	17	11	14
Emma Hrólfdís Hrólfsdóttir	13 ára	11	13	2	5
Tinna Hjaltadóttir	13 ára	10	10	9	10
Haraldur Helgi Hjaltason	12 ára	18	16	9	10
Sebastían Amor Óskarsson	12 ára	3	7	3	2
Hólmfríður Dögg Magnúsdóttir	12 ára	10	13	2	2
Mundína Þorgeirsdóttir	12 ára	Ógilt	10	1	1
Sóley Birna Arnardóttir	12 ára	13	16	14	20
Jasmín Þóra Harrinache	11 ára	Ógilt	17	14	15
Alda Máney Björgvinsdóttir	10 ára	14	17	5	7
Elísabet Ída Skarphéðinsdóttir	10 ára	20	31	6	17
Freyja Júlía Brynjarsdóttir	10 ára	Ógilt	5	2	2
Ragnheiður Kristín Ingvarsdóttir	10 ára	10	9	1	3
Marínó Örn Óskarsson	9 ára	1	2	1	1
Óliver Jökull Brynjarsson	9 ára	8	9	2	3